Roberto IACOVISSI
IL POPUL DI PAULI DI WARNEFRIT
Libri publicât intal mês di Setembar 2006 de Associazion Culturâl La Grame di Merêt di Tombe cul contribût de Regjon Friûl Vignesie Julie in cont de L.R. 15/1996,

"Lis regjons di Tramontane, cetant pIui che a son lontanis de ardince dal soreli e glaçadis de criure e de nêf, tant pIui a risultin favorevulis al benstâ dai oms e adatis al proliment des gjarnaziis... Par chest, sot dal cîl de Orse a nassin popui cussì numerôs che no a tuart chel teritori... al è nomenât cun tiermin gjenerâl Gjarmanie... E propit parcè che cheste tiere e dà disferente vite a tancj cristians, che a stentis e rive a nudrî, di je a son dispes jessudis tantis moltitudinis, che si son butadis... su la vicine Europe... Tal stes mût si partì de isule clamade Scandinavie... ancje il popul dai Winnili, ven a stâi dai Langobarts, che daspò al regnà felicementri in Italie..."
Cussì e scomence la Historia Langobardorum di Pauli Diacul, partint propit dal profont Nord, sclete "officina gentium", che di jê tancj popui a migrarin in grum viars il Mediterani in cercje di jerbe e di vin, saneôs di lâ daûr ae parabule sflandorôse dal soreli.
La narazion di Pauli di Warnefrit e trindule dispes tra storie e mît cemût che al sucêt a chel che si propon di tiessi "ab origine" la trame dal so popul. Dut al reste impalpabit e corne sfantât, e a voltis favolôs, tant che filtrât dal inesorabil scori dal timp contât -al è il câs dal nestri Diacul - intune altre lenghe, la lenghe latine che no jere di sigûr chê dai siei vons che, dome dusinte agns prime di passâ les Alps, a vivevin in Ongjarie, daprûf dal Balaton e a flanc dai Uns.
Al conte Pauli: "I Langobarts, duncje, lassade la Pannonie, a si movin cullis feminis, i fîs e dut ce che a vevin, par deventà parons de Italie. In Pannonie a jerin restâts cuarantedoi agns. A'nt vignerin fûr tal mes di avrîl, la zornade de Sante Pasche, che la sô fieste e colà chel an il prin di avrîl, che a jerin za passâts cincent e sessantevot agns de incarnazion di Nestri Signôr".
Condusût di Alboin, e finive a Forum Julii la lungje marce dal popul dai Winnili, scomençade des lontanis tieris de Scandinavie almancul vincj gjenerazions prime. Daspò l'Elbe, l'Oder, la Vistole e il Danau, vè finalmentri l'lsunz e il Natison. Contrariamentri a altris popui migradôrs, no jerin vignûts par fâ robariis, brusâ e tornâ a partî. I Langobarts a jerin vignûts par restâ, e chest al à vude la sô impuartance. Propit a Cividât al nassè Pauli, tor dal 720, fì dai nobii Warnefrit e Teodolinde. A Pavie al studià grêc e latin, al veve une buine culture religjôse e une otime culture classiche, sedi leterarie che storiografiche, che i permetè di jentrâ te Schola Palatina di Aquisgrane, dulà che al vivè te cort di Carli il Grant. Tes scuris popolazions vignudis jù dal Nord, Pauli Diacul al olme une fuarce degne de tradizion romane. L'amôr de sô int al va parie cun chel pe storie romane e cristiane, la culture e la lenghe che al à imparât. L' Historia Langobardorum, un capolavôr de storiografie di ogni timp, e je ancje une storie de nature europeane: maraveôs scuintris gjeografics, paesaçs viodûts e inmagjnâts, diluvions, inondazions, fugarilis, meracui. Su chest fondâl al passe il caotic flus di popolazions barbarichis, di fats di cagnetât e di sanc, contâts di un scritôr cjapât par un fuart sens dal mît e dal magjic. La ingjenuitât dal cronist de Alte Ete di Mieç si misure cun la fede dal cristian intun mix di culture e di ruspietât che al è tipic dal stîl di Pauli Diacul. Roberto Iacovissi, di passionât cultôr de storie dal Friûl, al à stazât cun meditade sapienze la liende umane di Pauli e il drame dal so popul, tradît di un erôr fatâl: chel di nimicâsi il pape. Il destin al jere segnât, e no dome suI cjamp di bataie dulà che, tal 774, i Langobarts a forin parâts vie dai Francs, ma ancje te memorie di chei che a vignirin daspò, parcè che, cemût che simpri al capite, aforin i vincidôrs a scrivi la storie.
A nuie al servì l' ultin tentatîf di Adelchi che al consegnà definitivamentri al languit abraç de storie il sium dal so popul. E sui Langobarts, il popul des lungjs barbis, si strucjà tant che un clapon il judizi sevêr e cence apel di Grivôr il Grant: "nefandissima gens".
Di in chê volte, i Langobarts a son stâts dispes archiviâts tant che barbars grubians e cence culture, sporcs e triscj, cun lis lôr copis rasadis e i lôr çufs che a plovin suI çarneli.
I timps a jerin chei che jerin, forsit lôr a forin i mancui barbars tra i cussì clamâts barbars.
Il 13 di avrîl dal 799 al murive a Mont Cjassin Pauli, diacul e frari, cjantôr des impresis dal popul che i veve volút tant ben. La pene e restà par simpri suI scriptorium.
Al jere rivât, tant che pal bisavon Lopichis, che une volte tornât de durece de prisonie te tiere dai Avars al ve ve picjade la cassele des frecis al vuâr cressut tra i baraçs de cjase in ruine, il moment di sierâ la sô clanfute umane e inteletuâl.
Cidine e restà la pene di Pauli.
Ma e va indenant, te velade trasparince dai secui, a contânus la fisicitât de sô int: cun voi latisins, cjavei slavâts e barbis rossitis, carnagjons di lat di profont nord, cun cromosoms sparniçâts tes nestris fibris in premeditât disordin, magari insuazât in chês tipichis musis a piruç ribaltât che tant a plasevin al grant medievalist Carli Guido Mor.
La storie e dà e la storie e gjave. Ma, in font, une vore e met adun, e pôc a si gjave, seont criteris che no si puedin viodi, che dispes cualchidun al ricognos te Providence.
Ma daspò il brut al torne il biel, daspò la scuretât e trionfe la lús.
Al è di mai e"... il cucuc al à za scomençât a cjantâ sui ramaçs pIui alts dai arbui.. ." al poetave suI ôr de Mose Alcuin di York, amì di Pauli.
Ancje su cheste precarietât, che si fâs continuitât, nus invide a rifletti l'autôr di chest libri scrit intune lenghe che ancje i Langobarts a contribuirin a insiorâ, fâsintnus intindi che il popul di Pauli di Warnefrit, in ultime analisi, al è il nestri popul furlan des tantis vitis, avilît forsit, ma no cuacjât, pront, in cheste tiere di incuintris e di scuintris, a racuei gnovis disfidis: no necessariamentri doprant scut e "scramasax".
Roberto Iacovissi, che di une vite al intraten amabilis feveladis cui pIui preseâts oms dal passât, siei fedei compagns di viaç tal timp presint, nus propon cun creançôs cjandôr une veretât forsit minime, ma essenziâl: che altre int, altris popui, altris gnûfs barbars a darpadin ai contôrs dal Imperi e a sburtin ai confins cul pês dal lôr crei boreç e des lôr dibisugnis, pronts a determinâ gnûfs cuilibris sociâi, politics e lenghistics.
E dut chest al sucedarà seont la eterne dinamiche dal incrosâsi des robis che a passin, ma par tornâ adun ogni volte in mûts simpri parêi, ma mai compagns.

Gianni Colledani